منتديات همسة ملاك

همسة ملاك ارقى تجمع عربي
 
الرئيسيةشاتس .و .جبحـثالأعضاءالمجموعاتالتسجيلدخول

شاطر | 
 

 بتتـــزكروا ؟

اذهب الى الأسفل 
كاتب الموضوعرسالة
بلقيس
نائبة المدير
نائبة المدير
avatar

انثى
عدد الرسائل : 261
العمر : 98
العمل/الترفيه : لا شغله ولا عمله
المزاج : عال متل بعضو
تاريخ التسجيل : 11/11/2008

مُساهمةموضوع: بتتـــزكروا ؟   الثلاثاء مارس 10, 2009 3:52 am

بتتذكروا ،،،،



بتتذكروا.. يوم يجي أخوك الأكبر منك ويقول لك: بدك أرسم لك ساعة وانته تمد إيدك ويعضّك هديك العضة اللي تضل مرسومة أسبوع.

بتتذكروا.. يوم كنا نتصوّر عند مصوّر العيلة وطبعاً غصب عنك الخلفية زرقاء مو بكيفك ولازم تمشط شعرك بالمشط اللي عنده.. كله شعر..


Arrow

بتتذكروا.. المصيص الأحمر اللي بيعلق بالسنان ومعو عود لونه احمر مخطط بالأبيض وكنا نقلبو بالمقلوب ونحطو ع الشمعة أو الغاز وننفخ مشان نساوي فقاقيع وطبعا ما تطلع النفيخة لحتى تطلع زلاعيمك معها وتنحرق كل أصابيعك.
Arrow
بتتذكروا.. يوم كنّا نشوف افتح يا سمسم ونتأثر بكعكي اللي ياكل بسكوت ونشتري بسكوت ونتم ناكل مثله

وبعدين نحطو بطاسة مي أو بالمغسلة وناكلو عم يشرشر.

بتتذكروا.. يوم الجمعة ... ‏نقوم من الصبح مشان نسمع أغنية في قصص الشعوب قصائص لا تنتهي

وعالم حلو بهي يسكن في القلوب في قصص الشعوب .

بتتذكروا.. تيلفون أبوقرص اللي يهلك أصابيعك وانت تتصل ويا ويلك يطلع الرقم مشغول لأنه ما في ريدايل.

بتتذكروا.. يوم كنا نربط الشرشف على رقابنا مثل سوبرمان ونطلع فوق الخزاين ونط على التخوت وآخر شي ناطط غلط ومنكسرة إيدك.

بتتذكروا.. يوم كنا نحط الآيس أو الكازوزة بالكيس بالتلاجة مشان تصير متلجة وكل ما بدك تجي تاخدها تلاقي الوالدة حاططته تحت ومانو متلّج.. يا حسرة.

بتتذكروا.. لما كانوا الأولاد يشطفوا البرندة بالصابون ويضلوا يتزحلطوا عليها طوال النهار وآخر الشي تنفكش رجل شي واحد وما ينام الليل لأنو رجلو ورمانة..


Arrow

بتتذكروا..لما كنا نستقبل الحجاج بكامل الفرحة واللهفة على الهدية والعيدية وآخر شي: مسواك ومسبحتين والكاميرا الحمراء وسجادة وللبنات قطعة قماش مبرقعة وساعة.


بتتذكروا.. عزايم قبل والسفرة ومفرش الطاولة اللي عليه صورة (‏فواكه) ‏وريحتو لازم مثل ريحة المطبخ وقاعد على كراسي القش اللي لما تقوم تلاقي سيقانك عليها شخوط ومربعات.

بتتذكروا.. أيام الدراسة لما نشد حيلنا بالدراسة ونشتري قلم فسفوري أصفر أو برتقالي مشان نظلل على الشي المهم وآخر شي نظلل على كل الكتاب.. وين الشي المهم؟؟ ما بعرف!!!!

Arrow

بتتذكروا وقت كنا نلعب خريطه بالحارة ونروح نطلع على البيت والولاد عم يدوروا علينا وتكون صارت الساعة وحده

بتتذكروا وقت كنا نلعب عامره من 3سنين

بتتذكروا وقت كنا صغار كانوا يساولنا مطعم بالبيت أهلنا ويعلقونا شمع ويحطوا الأكل على البرنده قال متل المطعم

بتتذكروا و الكازوزه ام 2.5 ل.س زينه

بتتذكروا مسلسل الساعة 9.30 الي بيطلع على القناة الأولى الي كنا نخلص دراستنا على الساعة 9.29

Arrow

بتتذكروا.. أول ما يسرق الأولاد سيارة أبوهم كانت الرجل اليمين على البنزين والرجل اليسار على الفرام من شدة الفرحة .... ‏ولازم طبعاً يمر على أولاد الحارة ويطلعوا معو شي خمسين واحد


‏ بتتذكروا.. لما تتقاتل مع ولد الجيران وتقول له: انقلع عن بيتنا وعن رصيفنا...

يقول لك: مو رصيفكن هادا رصيف الحكومة
كلام منطقي, ‏ويتم يمرق قدام البيت ويقول لك مادخلك.

بتتذكروا.. لما يروحوا الأولاد السوق مع أبوهن أو أمهن مشان يشتروا تياب للعيد ..وآخر شي شارين تياب متل بعض بس غير ألوان وتشوفن بأول يوم العيد من الأخ الكبير للصغير متل فرقة حسبالله.

بتتذكروا.. لما الشباب بدهن يعملو عضلات يرحوا يترسو علب النيدو باطون ويحطون بينهن عمود حديد وهووووووووب وآخر شي منكسرة ضهورهن.

cheers

بتتذكروا...لما نشيل الطراريح والشراشف ونعملهن خيم ...أو ناخذ المخدات الكبيرة ونعملهن بيوت.





Arrow


واللي ما عمل شي من المذكور فوق بيكون من جيل الهمبرغر وسبيس توون وأبطال الديجتال..راحت عليكم هديك الأيام

أولاد هالأيام بتلاقيه عايش مرحلة وحده بس ألا وهي مرحة الكبار: سيارة وموبايل و تدريجة وشحططة في الشوارع والمطاعم. ماشاف لا أفلام كرتون ولا لعب وهو صغير..



أول ما يفتح التلفزيون بتلاقيه يتفرج ع هيفا ونانسي وروبي

وعلى أيامنا قصص عالمية و حديث الجمعة الديني وسهرة صباحية ع الشدة كل ليلة خميس

وأم عمار ببرنامج ما يطلبه الجمهور

وعصمت رشيد يغني بين الشوطين

ويوم الجمعة سيران والله أيام





للأسف صار الجيل الجديد بلا هوية

_________________


...............................
يا قارئ خطي لا تبكي على موتي..
فاليوم أنا معك .. وغداً في التراب..
فإن عشت .. فإنا معك..وإن مت .. فللذكرى..!
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
yMoN
مدير الموقع
مدير الموقع
avatar

عدد الرسائل : 305
العمر : 33
تاريخ التسجيل : 10/09/2008

مُساهمةموضوع: رد: بتتـــزكروا ؟   الإثنين مارس 16, 2009 7:31 am

اي والله معك حق يا بلقيسو
بجد كانت ايام حلوه
يسلمو كتير يا حلوه
بجد انتي خطيره
ههههههههههه
على قولة دودو

هههههههههههههههه

ونصيحتي اوجهها الى كل طفل وطفله
كل ولد وبنت
لم يبلفو سن ال 14
ان يجربو ما جربناه
واني لكم من الناصحين
ههههههههههههههههههههههههه



_________________


قالت امي يوما
اخاف يا أبني أن يقتلك طموحك
لا تعلم أن
رموشك هي اخر سماء لأحلامي
والموت وجدته
قربك دمية بريئة

•ღღ••ღღ••ღღ••ღღ••ღღ•

بين عتمة رموشك
وفجر عيونك
بنيت مملكتي
حين رأني اهرمزاذ
قال هذه مملكة الله ...
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
بتتـــزكروا ؟
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات همسة ملاك :: (¯`·._) ( المملكة الرئيسية) (¯`·._) :: •ღ قصر المواضيع العامه والمتنوعه ღ•-
انتقل الى: