حسّوا شوي بالوضع ؟؟؟

السلام عليكم و رحمة الله و بركاته

عودة مؤقتة بعد غياب مطول نوعا ما بس حبيت فوت و أكتب هالكلمتين مشان حط الكل قدام الأمر الواقع يلي صاير بإخوانا و أهلنا بغزة

إخواني الأعضاء و الإداريين و المشرفين ... هاد رجاء بسيط من أخوكم مهند بتمنى إنكم تنفذوه لحتى يتغير الوضع في غزة .. و هو مو طلب إجباري أو ملزم بس مجرد رجاء ألو قيمة معنوية على الأقل في المساهمة بوقف إطلاق النار

الحال و الوضع الراهن يلي صاير بغزة بيبكي و بيحزن و بيخجل كمان قدام ركود و برودة الرد العربي الي اقتصر على التنديد و الإستنكار بس من غير ما نشوف تصرف مقنع

إخواني الأعزاء بالمنتدى الموقر بتمنى منكم تكون فعالين و مساهمين بالتعبير عن الوضع الراهن
نحنا صحيح مانا عايشين بغزة و لا نحنا قادرين نكون معاهم على أرض الواقع لحتى نقدر نقول إنو فينا نجاهد و نستشهد و و و ... و الشيئ الأخجل من هيك إنو حكامنا كمان عاجزين و عم يتفرجو على الوضع من غير ما يقوموا بعمل يوقف هالشيئ .. و عم يرجحو الحلول لغيرنا من الغرب بدعوى السياسة ... مع إنو بهيك موقف لازم نحط أرواح الأطفال و النساء و المدنيين يلي عايشين بين النيران بكفة و ننسى كفة السياسة شوي و المصالح العربية ...

الكلام كتير و الفعل قليل ... مشان هيك ما فيني إلا إني أطلب منكم إنكم تساهمو و تشاركو بأقلامكم على الأقل و أنسولي شوي المواضيع التانية و أمور الترفيه و التسلية
إكتبو عن الوضع في غزة .. سواء بالمواضيع أو بالشعر
إحكو عن تاريخ فلسطين و الصهيونية لأنو متأكد إنو في كتير ما بيعرفو هالشيئ
عبرو عن شعوركم بالوضع الراهن
إحكو أي شي .. المهم إنو غزة تكون أساس كلامكم

هاد أقل شيئ يمكن نقدر نعملو تضامنا مع أهلنا هنيك

خلونا نساهم بشيء بسيط يكون إلو موقف كبير و معنى أكبر

رجاء انسولي المواضيع الساذجة و قصص الحب و الغرام و الورمنسيات مؤقتا

حسّوا شوي بالوضع

حسّوااااااااااا

مابعرف

بحيّيّك مهند

إنما عندي كذا تعليق عاللي اتفضلت فيه؟!

1-أنا شفت موضوعك بس ((قررت))

ما أكتب شي ؟؟

ليش !! ......رح قلك ليش

يا غزة-ياغزة يحميكِ من عندو رب العزة

إن التاريخ سيبصق في وجه الخونة و السفلة

بجاه الرب آآآآآآآميّن

ابقي صامدة يا غزة هاشم

صيري كلكِ بركاناً واحرقي الاسرائيليين

أولاد الـ ( توووووووت)

وبعدين ارسال وبعدين x للمنتدى وخاطرك؟مع السلامة

وكل واحد بيروح عشغله وشي بيحط ع روتانا وشي بيقص أضافيرو

لأنو عميتدايئ شوي منن

وكلما ما شاف الواحد حالو فاضي بيجي بيكتبلو بيتين شعر

هادة ازا ما قلل مروّة وسرقهن من شي منتدى؟؟

الخلاصة يا أخي الكريم

عندي وجهة نظر. ألا وهيَ

ماحدى بالكون رح يقدر يحرر غزة الاّ أبنائها

وهنن مو بحاجة شي اطلاقاّ

لاخبز ولا شاي ولا حتى تنديد ولا تعاطف

ولا أي شي من هالعالم كلون

واسرائيل شوفة عينك مو سائلة بمجلس الأمن ولا بأكبر حدى بالعالم

وصرلون سنين مخططين لهالشي وبعتقد ئاموا فكرة التوسع

وقرروا يغتصبوا فلسطين اتلمحتلة فقط؟؟
أهل غزة على مصر/ أهل الضفة علأردن

وفاطمة أخت فطوم= شي واضح ومفروغ منْوّ.

لذلك بما أنه رب العالمين عادل ويُمهل ولا يُهمل

علينا أن نكتفي بالدعاء والتمني من الله

أن يجعل كيد الصهاينة في نحرهم.

ونبقى صادقين في نيتنا وقلوبنا معهم مو بالحكي؟؟

بالقلب .

وأخيراً وآخراً

ألله يصبر الأمهات

و ينصر كل مظلوم وصاحب حق

بهالعالم كلو.

وبتمنى تقرء ردي مرتين

وما تعطي رأيك أو ردك من الانطباع الأول.

وبغض النظر عن كل هالحكي

ألله كريم وبيعرف كل واحد شو في بقلبو تجاه الآخرين

والسلام عليكم ورحمة الله وبركاته

اول شي اهلين مهند
نورت من جديد بوجودك معنا
تاني شي عيوني من شان هاد الموضوع
انا من جهتي مابحب احكي بهيك مواضيع
مو لان ماعندي حس عربي
بالعكس
انا عم اتالم بالشي يلي عم اشوفه واسمعه
بس برأيك شو طالع بإيدينا نحن كشعب ؟
اذا ولاة الامور ماعملو شي
الشعب شو بدو يعمل ؟؟
طيب لنفرض كتبنا وحكينا وتظاهرنا ومابعرف شو
وصرخنا باعلى اصواتنا
برأيك في حدا رح يسمعنا ؟
اصلا شو ما عملنا ولا شايفينا هنن
ولا سائلين علينا
طيب انا مابدي اخجلك ورح اكتب يكفي إراقة الدماء
ويا ناس مابصير هالشي
ونحن معك يا غزه
وتوقفي يا اسرائيل هذا لايجوز

طيب وبعدين شو صار ؟؟؟
سمعو كلامنا ؟
يا ما طلعنا مظاهرات وياما عملنا العمايل وياما وياما وبعدين ؟؟؟
ايام العراق شو صار ؟؟
بالاخير ماصار غير يلي هنن بدون اياه
متل ما حكى نضال في رده
هالشي مدروس من زمان وفلسطين لن يحررها الا اهلها
والنصر للمسلمين ولكن عندما يشاء الله
ومتل ما قال نضال
علينا أن نكتفي بالدعاء والتمني من الله
أن يجعل كيد الصهاينة في نحرهم.
ونبقى صادقين في نيتنا وقلوبنا معهم مو بالحكي؟؟
وبتمنى ما تتدايق يا مهند من الرد
بس هاد الواقع
انت قلت خلينا نساهم وحسو وزوقو ومابعرف شو
بس صدقني قد ما كتبنا وقد ما عبرنا مارح يصير شي
الوضع رح يضل متل ما هو
تحياتي يا غالي

الـــــــــسلام عليـــــك

احــيــــــيك على نخواتك وشهامتـــــــك
احيــــــيك على صحوه الضمير هـــــهذه

حسّوا شوي بالوضع ؟؟؟ Up_arab-x_com_bd1fcc1fd9

اخي الكريم:

اتحسبنا غير مبالين بما يحدث؟

او اننا نفتقد الاحساس والضمير..

صدقني جميعنا هناا نشعر بالقهر والغضب مما يحدث

جميعنا نتألم لالم غذه..

ونبكي على صراخ غذه ..

كلما فتحنا شاشات التلفزه ورأينا الاطفال تلف باكفان بيضاء

نختنق قهراا والماا ..

كلما رأيت الخوف في عيون الاطفال اشعر بضيق نفس في صدري

يتخيل لي انهم ابنائي او اخوتي فيحترق قلبي وابكي

ولكن ما باليد حيله ..وما من شيء نفعله

طالما من هم اكبر منا قوه وقدره لم يسطيعو فعل شيء

ما عسانا ا نحن ان نفعل..

تظاهرنا .ومشينا بالشوارع ..

عضبناا ..وشتمنا..وبكينا... وماذا بعد

لما يسمعنا احد ولم يابه احد لصراخنا وندائنا

ولم يأخزوها بعين الاعتبار حتى

مهما كتبنا ومهما قلنا لن يتغير شيء

ولن يسمعنا احد ولا حتى اهلنا في غزه

فمن المؤكد انهم لا يجلسون وراء شاشات الكمبيوتر

ليقرأو ما يتكلم عنهم الناس عبر النت

في وضعهم هاذاا

غزه تحتاج لفعل لمساعده حقيقيه فعليه... غزه تموت

والكلام لا يجدي نفعا في هذه الحاله

لا يسعنا نحن سوا ان نصلي وندعي لله ان يفك محنتهم

ويحميهم وينصرهم على اعدائم

غزه لها رب يحميها لا يرضى بالظلم ابدا

اقوى مني ومنك ومن كل بشر

هنالك رب يرجع للمظلوم حقه المسلوب

ويعاقب الظالم اشد عقااب

ولو اراد لمحى البشريه كما خلقها وجعلها

ستصعب عليه اسرائيل؟

اخي الكريم:
الله يعلم ما في القلوب من قهر وكم زرفنا دموعا على من استشهدو

كتبنا عبر صفحات هذا المنتدى عما في داخلنا وعبرنا عن المنا

ولكن لا نستطيع ان نوقف الاستمراريه في باقي الاقسام

فبهذا انت تدعونا لعدم الكتابه الا ضمن اطار معين

وهذا سينعكس سلبياا على منتداكم سيمنع اقبال المتصفحين

ان كانو اعضاء او زائرين لان الموقع سيصبح في حاله جمود

تحياتي لك

بشكرك اخي مهند على موضوعك

بس بقلك
مو بس انت يللي حاسس او زعلان باللي عم يصير
كلنا متأثرين ويمكن اكتر منك
بس هاد مابيعني انو توقف حياتنا عند هالنقطه
يعني نحنا زعلنا بس مابيطلع بأيدنا شي غير انو ندعيلون
بكل قلب صادق
وبرأيك انت هلئ اذا وقفنا المواضيع العامه
وصرنا نكتب عن غزه
شو رح يصير؟؟؟
شو رح يستفيدو
حبيبي اذا بدك تفيد هالشعب المسكين ياأما بتروح بتحارب معون
واذا مابتقدر ادعيلون
مو بس ننزلون مواضيع مارح تفيد شي
بعدين انا عن نفسي كتبت موضوع عن غزه
وفي غيري كتب عن غزه
برأيك لازم نملي المنتدى عن مواضيع الحرب
مامنقدر نقول غير الله يكون معون
وينصرون
عالعموم بتشكرك اخي مهند
بس انت حكيت هيك يمكن لأنك كنت متأثر شوي
معلش طول بالك
والله يصبرك ويصبر اهلنا كلون

تقبل مروري

بس كل الكلام يلى عم تحكوا كله صح

اى انا الى من فلسطين مو طالع بايدى شى حتى اساعدهم بشى
بس كل الى بقدر عليه انى ادعيلهم من قلبى
يسلموا اخ مهند على كلامك وعلى وطنيتك خلينى اقول
بس الكلام ماراح يجيب فايدة ولا الموضيع ولا شى
بس الى بنقدر نعمله ندعيلهم
وانا كنت باتمنى انى اكون بين ناسى واهلى وجيرانى فى هيك موقف
بس اتاكدوا انوا كل الفلسطينية ايد وحدة بهيك موقف
والشعب الفلسطينى اتعود على المجازر وعلى الالقتل والزبح بس مع هيك احنا شعب صامد وقفين فى وش الا سرائلين
وماراح انهزالهم هما معهم السلاح وامريكا وحنا معنا ربنا وكل الشعوب الى وقفت معنا
وفى الاول وفى الاخر بدنا نحكى بعين الله
فى ها المجزرة الى فقدواعائلات بكمالها اكيد كلكم شفتوا التلفزيون وعارفين كل شى
المهم انا حبيت اشكر كل الاعضاء ( مهند نضال ورامى وخالد وبلقيس ومازن كل واحد كان حاسس فى الشعب الفلسينى)
مابعرف احكى كثير بس شكرا الكم وعلى مواضيعكم انا اليوم لاسه شفتها
كلنا ايد وحدة وشعب واحد
وياجبل ما يهزك ريح